ஐஆர்சிடிசி (IRCTC) செயலி அல்லது இணையதளம் வாயிலாக ரயில் டிக்கெட் முன்பதிவு செய்பவர்களுக்கு ஜனவரி 12, 2026 முதல் புதிய விதிமுறைகள் அமலுக்கு வருகின்றன. டிக்கெட் முன்பதிவில் ஏஜென்ட்களின் ஆதிக்கத்தைக் குறைக்கவும், போலி கணக்குகள் மூலம் மொத்தமாக டிக்கெட் வாங்குவதைத் தவிர்க்கவும் இந்திய ரயில்வே இந்த அதிரடி மாற்றத்தைக் கொண்டு வந்துள்ளது.
ஆதார் இணைப்பிற்கான முன்னுரிமை மற்றும் சலுகைகள்
ஜனவரி 12-ஆம் தேதியிலிருந்து ஐஆர்சிடிசி கணக்குடன் ஆதார் எண்ணை இணைத்துச் சரிபார்ப்பு (Authentication) முடித்தவர்களுக்கு மட்டுமே டிக்கெட் முன்பதிவில் முன்னுரிமை வழங்கப்படும். முன்பதிவு தொடங்கும் முதல் நாளன்று (ARP Opening Day), காலை 8 மணி முதல் இரவு 12 மணி வரை என மொத்தம் 16 மணி நேரச் சலுகை ஆதார் இணைக்கப்பட்ட கணக்குகளுக்கு வழங்கப்படுகிறது. இந்த நேரத்தில் ஆதார் இணைக்கப்படாத கணக்கு வைத்திருப்பவர்கள் ஆன்லைன் மூலம் டிக்கெட் எடுக்க முடியாது. ஆதார் சரிபார்க்கப்படாத பயனர்கள் இரண்டாம் நாளிலிருந்து மட்டுமே முன்பதிவு செய்ய அனுமதிக்கப்படுவார்கள்.
நேரடி முன்பதிவு மற்றும் பயணிகளுக்கான அறிவுரை
ரயில் நிலைய கவுண்ட்டர்களில் நேரில் சென்று டிக்கெட் முன்பதிவு செய்யும் நடைமுறையில் எந்த மாற்றமும் இல்லை. இந்த புதிய கட்டுப்பாடு ஆன்லைன் முன்பதிவு செய்பவர்களுக்கு மட்டுமே பொருந்தும். முதலில் 10 நிமிடங்களாக இருந்த இந்தச் சலுகைக் காலம், பின்னர் 4 மணி நேரமாக உயர்த்தப்பட்டு, தற்போது முதல் நாள் முழுவதும் என விரிவாக்கப்பட்டுள்ளது. எனவே, அடிக்கடி ரயிலில் பயணம் செய்பவர்கள் தடையின்றி டிக்கெட் எடுக்க இப்போதே ஐஆர்சிடிசி கணக்குடன் ஆதாரை இணைப்பது நல்லது.
ரயில் பயணிகளுக்கு ஐஆர்சிடிசி (IRCTC) புதிய கட்டுப்பாடு! நாளை முதல் ஆதார் இணைப்பு கட்டாயம்!
