இண்டிகோ விமானச் சேவை ரத்து: சிக்கிய பயணிகளுக்கு உதவுவதற்காக 84 சிறப்பு ரயில்களை அறிவித்தது இந்திய ரயில்வே!

நாடு முழுவதும் இண்டிகோ விமான நிறுவனத்தின் சேவை கடுமையாகப் பாதிக்கப்பட்டுள்ள நிலையில், இதன் காரணமாக இலட்சக்கணக்கான பயணிகள் தங்களுடைய பயணத் திட்டங்களை நிறைவேற்ற முடியாமல் தவித்து வருகின்றனர். இந்தச் சூழ்நிலையில், விமானச் சேவை ரத்தால் பாதிக்கப்பட்ட பயணிகளுக்கு உதவ இந்திய ரயில்வே சிறப்பு ரயில்களை அறிவித்துள்ளது.

சிக்கலுக்கான காரணம்:

விமானிகள் மற்றும் விமானப் பணியாளர்களுக்கான பணி நேரக் கட்டுப்பாடு தொடர்பாக DGCA கொண்டு வந்த ஒழுங்குமுறைகளை நடைமுறைப்படுத்துவதில் இண்டிகோ நிறுவனம் பெரிய சிக்கலைச் சந்தித்து வருகிறது. இதன் விளைவாக, பணியாளர்களுக்குப் பற்றாக்குறை ஏற்பட்டு, நாடு முழுவதும் நூற்றுக்கணக்கான இண்டிகோ விமான சேவைகள் ரத்து செய்யப்பட்டுள்ளன. கிறிஸ்துமஸ் மற்றும் புத்தாண்டு விடுமுறையை ஒட்டிப் பயணச் சீட்டுகளை முன்பதிவு செய்தவர்களின் திட்டங்கள் இதனால் பாதிக்கப்பட்டுள்ளன.

இந்திய ரயில்வேயின் உதவிக்கரம்:

பாதிக்கப்பட்ட பயணிகள் தடையின்றித் தங்களுடைய பயணங்களைத் தொடரக்கூடிய வகையில், ரயில்வே துறை முக்கிய வழித்தடங்களில் கூடுதல் ரயில்களை இயக்கி வருகிறது.

சிறப்பு ரயில்கள்  நாடு முழுவதும் கூடுதலாக 84 சிறப்பு ரயில்கள் இயக்கப்படுகின்றன என ரயில்வே துறை அதிகாரிகள் தகவல் தெரிவித்துள்ளனர்.

கூடுதல் பெட்டிகள்  அத்துடன், 37 வழக்கமான ரயில்களில் 116 கூடுதல் பெட்டிகள் இணைக்கப்பட்டுள்ளன. சதாப்தி மற்றும் ராஜ்தானி எக்ஸ்பிரஸ் ரயில்களில் கூட கூடுதலாக ஏசி பெட்டிகளும், சேர் கார்களும் சேர்க்கப்பட்டுள்ளன.

பயணிகள் திறன்  புதிய ரயில்கள் மற்றும் கூடுதல் பெட்டிகள் இணைக்கப்பட்டதன் மூலம், ஒரு நாளைக்குக் கூடுதலாக 35 ஆயிரம் பேர் பயணிக்க முடியும் என ரயில்வே தெரிவித்துள்ளது. நிலைமை சீராகும் வரை இந்த கூடுதல் சேவைகள் பயன்பாட்டில் இருக்கும்.

முக்கிய வழித்தடங்கள் மும்பை – புது டெல்லி, மும்பை – கோவா, லக்னோ – மும்பை, நாக்பூர், கோரக்பூர் – மும்பை போன்ற முக்கிய வழித்தடங்களில் கூடுதல் ரயில்கள் இயக்கப்படுகின்றன.

தெற்கு ரயில்வே தெற்கு ரயில்வே பிரிவிலும் கூடுதல் ரயில் பெட்டிகள் இணைக்கப்பட்டுள்ளன. உதாரணமாக, திருச்சி – ஜோத்பூர், சென்னை சென்ட்ரல் – திருவனந்தபுரம், மும்பை – சென்னை கடற்கரை ஆகிய ரயில்களில் பெட்டிகள் அதிகரிக்கப்பட்டுள்ளன. சென்னை எழும்பூரில் இருந்து தெலுங்கானாவுக்குச் சிறப்பு ரயில் ஒன்றும் இயக்கப்பட்டது.