தமிழக அரசு ஊழியர்களின் நீண்ட கால கோரிக்கையை ஏற்று, முதலமைச்சர் மு.க.ஸ்டாலின் அறிவித்த ‘தமிழ்நாடு உறுதியளிக்கப்பட்ட ஓய்வூதியத் திட்டம்’ (Tamil Nadu Assured Pension Scheme) கடந்த ஜனவரி 1, 2026 முதல் அதிகாரப்பூர்வமாக நடைமுறைக்கு வந்துள்ளது. இதற்கான அரசாணையைத் தமிழக நிதித்துறைச் செயலாளர் உதயசந்திரன் வெளியிட்டுள்ளார். மத்திய அரசின் ஒருங்கிணைந்த ஓய்வூதியத் திட்டத்தை (UPS) முன்மாதிரியாகக் கொண்டு இந்தத் திட்டம் வடிவமைக்கப்பட்டுள்ளது.
திட்டத்தின் நிதிப் பங்களிப்பு மற்றும் ஊதியச் சலுகைகள்
இந்தத் திட்டத்தின் கீழ் பணிபுரியும் அரசு ஊழியர்கள் ஓய்வு பெறும்போது, அவர்கள் கடைசியாகப் பெற்ற அடிப்படை ஊதியத்தில் 50 சதவீதம் மாதாந்திர ஓய்வூதியமாக உறுதியாக வழங்கப்படும். ஒருவேளை ஓய்வூதியதாரர் காலமானால், அவர் கடைசியாகப் பெற்ற சம்பளத்தில் 60 சதவீதம் அவரது குடும்பத்திற்கு ஓய்வூதியமாக வழங்கப்படும். மேலும், அரசு ஊழியர்களுக்கு ஆண்டுக்கு இரண்டு முறை அகவிலைப்படி (DA) உயர்த்தி வழங்கப்படும் என அரசாணையில் தெரிவிக்கப்பட்டுள்ளது.
இதற்காக ஊழியர்கள் தங்கள் மாதச் சம்பளத்தில் 10 சதவீதத்தைப் பங்களிப்பாக வழங்க வேண்டும்; இதற்கான மீதமுள்ள கூடுதல் நிதிச் சுமையைத் தமிழக அரசே ஏற்கும் என அறிவிக்கப்பட்டுள்ளது. மூத்த ஐஏஎஸ் அதிகாரி ககன் தீப் சிங் பேடி தலைமையிலான குழு அளித்த விரிவான பரிந்துரைகளின் அடிப்படையில், பழைய ஓய்வூதியத் திட்டம் மற்றும் பங்களிப்பு ஓய்வூதியத் திட்டம் ஆகியவற்றை ஆய்வு செய்த பின்னரே இந்த புதிய முடிவு எடுக்கப்பட்டுள்ளது.
யாருக்கெல்லாம் இந்தப் புதிய திட்டம் பொருந்தும்?
2026 ஜனவரி 1-ஆம் தேதி முதல் பணியில் சேரும் தகுதியுள்ள அனைத்து ஊழியர்களுக்கும் இந்தத் திட்டம் கட்டாயமாகும். அதேபோல், ஜனவரி 1 அல்லது அதற்குப் பின் ஓய்வு பெறும் ஊழியர்களும் இந்தத் திட்டத்தின் பலன்களைப் பெறலாம். இதற்கு முன் பணியில் இருந்த ஊழியர்கள், தங்களின் விருப்பத்திற்கேற்ப பங்களிப்பு ஓய்வூதியத் திட்டம் (CPS) அல்லது இந்தப் புதிய திட்டத்தைத் தேர்வு செய்யும் வசதி அளிக்கப்பட்டுள்ளது.
தமிழக அரசு ஊழியர்களுக்குப் புதிய ‘உறுதியளிக்கப்பட்ட ஓய்வூதியத் திட்டம்’! ஜனவரி 1 முதல் அமல்!
