இந்தியாவில் புதிய 500 ரூபாய் நோட்டுகளில் கள்ள நோட்டுகளின் புழக்கம் கணிசமாகக் கூடியுள்ளதாக மத்திய நிதி அமைச்சகத்தின் பொருளாதார விவகாரத் துறை (Department of Economic Affairs) வெளியிட்டுள்ள தரவுகள் தெரிவிக்கின்றன.
கள்ள நோட்டுப் புழக்கத்தின் நிலை
இந்தியாவில் தற்போது புழக்கத்தில் உள்ள கள்ள நோட்டுகளில், 500 ரூபாய் நோட்டுகள்தான் அதிக அளவில் கண்டறியப்பட்டுள்ளன. உயர் மதிப்புள்ள ₹2,000 நோட்டுகள் திரும்பப் பெறப்பட்ட பிறகு, புதிய 500 ரூபாய் நோட்டுகளை நோக்கி இதன் புழக்கம்,மாறியுள்ளது.
2024-25 நிதியாண்டில் மட்டும் 1,17,722 போலி 500 ரூபாய் நோட்டுகள் கண்டறியப்பட்டுள்ளன. இது முந்தைய நிதியாண்டுகளை விட அதிகபட்ச எண்ணிக்கையாகும்.
கள்ள நோட்டுகளை வைத்திருப்பவர்கள், புழக்கத்தில் இல்லாத ₹2,000 நோட்டுகளிலிருந்து புழக்கத்தில் உள்ள ₹500 நோட்டுகளுக்குத் தங்கள் கவனத்தை மாற்றியுள்ளனர் என்பதைத் தரவுகள் காட்டுகின்றன.
2023-24 நிதியாண்டில் 26,035 ஆக அதிகரித்திருந்த போலி ₹2,000 நோட்டுகளின் எண்ணிக்கை, 2024-25 நிதியாண்டில் கடுமையாகக் குறைந்து 3,508 ஆகச் சரிந்துள்ளது.
மற்ற நோட்டுகளின் நிலை
₹100 நோட்டுகள்: போலி ₹100 நோட்டுகளின் எண்ணிக்கை 51,069 ஆகக் குறைந்துள்ளது (2020-21 இல் 1,10,736).
₹200 நோட்டுகள்: போலி ₹200 நோட்டுகளின் எண்ணிக்கை 32,660 ஆக அதிகரித்துள்ளது (2020-21 இல் 24,245).
மொத்த போலி நோட்டுகள்: 2024-25 நிதியாண்டில் அனைத்து மதிப்புகளின் மொத்தப் போலி நோட்டுகளின் புழக்கமும் 2,17,396 ஆகப் பதிவாகியுள்ளது (2021-22-ல் இது உச்சத்தில்இருந்தது).
மத்திய அரசின் நடவடிக்கை
கள்ள நோட்டுகளின் புழக்கத்தைக் கட்டுப்படுத்துவதற்காக, மத்திய நிதி அமைச்சகம் இந்திய ரிசர்வ் வங்கியுடன் இணைந்து, ரூபாய் நோட்டுகளின் பாதுகாப்பு அம்சங்களை (Security Features) தொடர்ந்து மதிப்பாய்வு செய்து வருவதாகத் தெரிவித்துள்ளது. புதிய வடிவமைப்புகள் மற்றும் பாதுகாப்பு மேம்பாடுகளை அறிமுகப்படுத்துவது என்பது கள்ள நோட்டுகளை எதிர்கொள்வதற்கான ஒரு தொடர்ச்சியான செயல்முறையாகும்.
