2025-ஆம் ஆண்டில் இந்தியப் பங்குச் சந்தை ஒரு வரலாற்றுச் சாதனையைப் படைத்துள்ளது. சர்வதேச பொருளாதார நெருக்கடிகளுக்கு மத்தியிலும், இந்தியாவில் ₹1 லட்சம் கோடிக்கும் அதிகமான சந்தை மதிப்பு (Market Cap) கொண்ட நிறுவனங்களின் எண்ணிக்கை 110-ஆக உயர்ந்துள்ளது. கடந்த ஆண்டில் இந்த எண்ணிக்கை 97-ஆக மட்டுமே இருந்தது குறிப்பிடத்தக்கது.
முன்னணி நிறுவனங்களும் சந்தைப் பங்களிப்பும்
பி எஸ் இ-ல் (BSE) பட்டியலிடப்பட்டுள்ள மொத்த சந்தை மதிப்பில், இந்த 110 நிறுவனங்கள் மட்டுமே சுமார் 62% பங்கைக் கொண்டுள்ளன. சந்தை மதிப்பில் முதல் மூன்று இடங்களைப் பிடித்துள்ள நிறுவனங்கள்:
ரிலையன்ஸ் இண்டஸ்ட்ரீஸ் – ₹20.89 லட்சம் கோடி
ஹெச்.டி.எஃப்.சி வங்கி – ₹15.07 லட்சம் கோடி
பார்தி ஏர்டெல் – ₹12.75 லட்சம் கோடி
புதிய வரவுகளும் ஐபிஓ (IPO) தாக்கமும்
நடப்பு ஆண்டில் புதிதாக 20 நிறுவனங்கள் இந்த “லட்சம் கோடி கிளப்பில்” இணைந்துள்ளன. குறிப்பாக எல்ஜி எலக்ட்ரானிக்ஸ், டாடா கேபிடல், குரோ (Groww) மற்றும் மீஸோ (Meesho) போன்ற நிறுவனங்கள் ஐபிஓ மூலம் இப்பட்டியலில் நுழைந்துள்ளன. இதுதவிர, முத்தூட் பைனான்ஸ், கனரா வங்கி, வோடபோன் ஐடியா மற்றும் பி எஸ் இ (BSE) போன்ற நிறுவனங்களும் இந்த மைல்கல்லை எட்டியுள்ளன.
சந்தையின் தற்போதைய நிலை
நிபுணர்களின் கருத்துப்படி, 2025-ல் லார்ஜ் கேப் மற்றும் மெகா கேப் பங்குகள் சிறப்பான வளர்ச்சியைப் பதிவு செய்துள்ளன. இருப்பினும், மிட்கேப் மற்றும் ஸ்மால் கேப் பங்குகள் எதிர்பார்த்த அளவு வளராததால், பல முதலீட்டாளர்களின் போர்ட்ஃபோலியோக்கள் அழுத்தத்தில் உள்ளன. அதே நேரத்தில், கடந்த ஆண்டு பட்டியலில் இருந்த ஆர்இசி (REC), மேன்கைண்ட் பார்மா மற்றும் பஜாஜ் ஹவுசிங் பைனான்ஸ் உள்ளிட்ட 12 நிறுவனங்கள் சந்தை சரிவு காரணமாக இப்பட்டியலில் இருந்து வெளியேறியுள்ளன.
₹1 லட்சம் கோடி மதிப்பை எட்ட வாய்ப்புள்ள நிறுவனங்கள் ஹெச்பிசிஎல் (HPCL), மசகான் டாக் (Mazagon Dock), பிஹெச்இஎல் (BHEL), மற்றும் மாரிகோ ஆகிய நிறுவனங்கள் விரைவில் இந்த இலக்கை எட்டும் நிலையில் உள்ளன.
இந்திய பங்குச் சந்தை சாதனை: ₹1 லட்சம் கோடி கிளப்பில் 110 நிறுவனங்கள்!
