மக்கள் பெரும்பாலும் தங்கள் சிபில் ஸ்கோரை சாதாரணமாக எடுத்துக்கொள்கிறார்கள். ஆனால் வங்கிகளில் கடன் பெறுவதைப் பொறுத்தவரையில், சிறியதாகத் தோன்றும் இந்த சிபில் ஸ்கோர் என்பது ஒரு முக்கியப் பங்கை வகிக்கிறது. குறைந்த கிரெடிட் ஸ்கோர், வசதி படைத்தவர்கள்கூட கடன் பெறுவதைக் கடினமாக்கும். இந்த ஸ்கோர் 300 முதல் 900 வரை இருக்கும். கடன் வழங்குவதற்கு முன்பு வங்கிகள் அல்லது வங்கி சாரா நிதி நிறுவனங்கள் நீங்கள் கடனை சரியான நேரத்தில் திருப்பிச் செலுத்த முடியுமா என்பதைத் தீர்மானிக்க இந்த ஸ்கோரைப் பயன்படுத்துகின்றன.
அப்படிப்பட்ட, மிகவும் முக்கியமாக உள்ள சிபில் ஸ்கோரைப் பாதிக்கக்கூடிய ஏழு முக்கியமான தவறுகள் உள்ளன. அதுகுறித்து இங்கே பார்க்கலாம்.
தொடர்ந்து EMIகளைத் தவறவிடுதல்
உங்கள் கடன் EMIகளை சரியான நேரத்தில் செலுத்தத் தவறினால் அது உங்கள் கிரெடிட் ஸ்கோரை நேரடியாகப் பாதிக்கும். தொடர்ந்து EMIகளைத் தவறவிடுவது அல்லது கடன்களைத் திருப்பிச் செலுத்தத் தவறுவது உங்கள் ஸ்கோரை வெகுவாகக் குறைத்து எதிர்காலத்தில் கடன் பெறுவதைக் கடினமாக்கும்.
அதிகப் பணம் கடன் வாங்குதல்
நீங்கள் அதிகப் பணம் கடன் வாங்கும்போது, உங்களிடம் ஏற்கனவே கணிசமான அளவு கடன் உள்ளது என்பதை அது காட்டுகிறது. வங்கி உங்களை ஒரு கூடுதல் சுமையாகக் கருதலாம். அது உங்கள் ஸ்கோரை குறைக்கலாம்.
தொடர்ந்து கடன்களுக்கு விண்ணப்பித்தல்
நீங்கள் வெவ்வேறு வங்கிகளில் தொடர்ந்து கடன்களுக்கு விண்ணப்பித்தால் ஒவ்வொரு முறையும் உங்கள் ஸ்கோர் சரிபார்க்கப்படும். இது ஒரு கடினமான விசாரணை (hard inquiry) என்று அழைக்கப்படுகிறது. மேலும் இது உங்கள் ஸ்கோரையும் குறைக்கும்.
கிரெடிட் கார்டுகளை அதிகமாகப் பயன்படுத்துதல்
உங்கள் கிரெடிட் கார்டு வரம்பின் பெரும்பகுதியை நீங்கள் செலவழித்தால், உங்கள் கடன் பயன்பாட்டு விகிதம் (credit utilization ratio) அதிகரிக்கும். உங்கள் வரம்பில் 30 சதவீதத்துக்கும் குறைவாகப் பயன்படுத்த முயற்சி செய்யலாம்.
மீண்டும் மீண்டும் விண்ணப்பித்தல்
ஒவ்வொரு புதிய கிரெடிட் கார்டு விண்ணப்பமும் ஒரு கடினமான விசாரணைக்கு வழிவகுக்கிறது. இது தற்காலிகமாக உங்கள் மதிப்பெண்ணைக் குறைக்கும்.
கிரெடிட் கார்டை குளோஸ் செய்தல்
கிரெடிட் கார்டை குளோஸ் செய்வது ஒரு நல்ல யோசனை என்று பலர் நினைக்கிறார்கள். ஆனால் அவ்வாறு செய்வது உங்கள் மொத்த கடன் வரம்பைக் குறைக்கும். அது உங்கள் பயன்பாட்டு விகிதத்தை அதிகரித்து, உங்கள் மதிப்பெண்ணில் சரிவை ஏற்படுத்தும்.
கடனை முன்கூட்டியே செலுத்துதல்
ஒரு கடனை முன்கூட்டியே மூடுவது எப்போதும் ஒரு நல்ல யோசனை அல்ல. குறிப்பாக உங்களிடம் ஒரு பாதுகாக்கப்பட்ட கடன் (secured loan) இருந்தால், முன்கூட்டியே மூடுவது உங்கள் மதிப்பெண்ணை சற்றே பாதிக்கும்.
